Vefurinn Gen.is er upplýsingavefur  þar sem ensk orð og hugtök varðandi erfðafræði og arfgenga sjúkdóma eru þýdd á íslensku. Eigandi og árbyrgðarmaður eru Vigdís Stefánsdóttir erfðaráðgjafi. Athuga ber að þó svo upplýsingar á vefnum séu aðeins hafðar eftir áreiðanlegum heimildum, er honum ekki ætlað að koma í stað upplýsinga frá viðeigandi heilbrigðisstarfsfólki. 

Stærsti hluti vefsins er orðalisti þar sem erlend orð og hugtök í erfðafræði eru skýrð á íslensku en eiitt af markmiðum Gen.is er að efla notkun íslenskra hugtaka og heita í erfðafræði. Unnið hefur verið gott starf á því sviði af ýmsum aðilum m.a. með útgáfu orðasafna. Við gerð orða- og hugtakalistans hefur verið stuðst við nokkur þeirra og þessi helst: Ensk-íslenska orðaskrá úr erfðafræði eftir Guðmund Eggertsson (Líffræðiskor Háskóla Íslands 1997) Ensk-íslenska orðaskrá úr frumulíffræði og þroskunarfræði, sem tekin var saman af Guðmundi Eggertssyni og Sigurði S. Snorrasyni (Líffræðiskor Háskóla Íslands, 1994), Líforðasafn eftir Hálfdán Ómar Hálfdánarson og Þuríði Þorbjarnardóttur, (Offsetfjölritun 1997), Íorðapistla Læknablaðsins, eftir Jóhann Heiðar Jóhannsson (Læknablaðið, fylgirit 41/2001). Íorðasafn lækna sem orðalefnd Læknafélaganna stóð að (ritstjóri Magnús Snædal er einnig gagnlegur en inniheldur takmarkaðar upplýsingar um sameindalífvísindi og skyld svið. Við gerð orðalistans var einnig stuðst við Orðabanka íslenskrar málstöðvar en hann er fljótleg og góð aðferð til að finna íslenskar þýðingar á erlendum orðum. Nokkuð er um nýyrði sem verið er að prófa í málinu.

Ekki hefur verið gerð tilraun til að rekja uppruna orða, enda er hann oft óþekktur og notuð var almenn málnotkun eins og hún kemur aðstandendum vefsins fyrir sjónir. Við gerð listans hafa kostir vefumhverfis verið nýttir með því að nota myndir og setja tengla í aðra vefi og ítarumhverfi eftir því sem ástæða er til. Listinn verður í stöðugri þróun og er ekki villulaus og eru lesendur beðnir um að senda tölvupóst með tillögum og leiðréttingum, breytingum og nýjum orðum eftir atvikum. Einnig eru stuttir textar um ýmsa arfgenga sjúkdóma en þeir skipta þúsundum. Oft er sjúkdómurinn sem leitað er að sjaldgæfur og því erfitt að finna upplýsingar sem koma að gagni. Uppástungur og upplýsingar eru vel þegnar. Aðstandendur doktor.is, Vísindavefsins og Greiningarstöðvar hafa góðfúslega leyft að efni frá þeim sé notað gegn því að sömu aðilar megi nota efni frá gen.is. Slík samvinna er mikils virði og gefur vefnum meira gildi. 

Síðast en ekki síst er grunnfræðsla um erfðafræði og er henni skipt upp í flokkana I, II og III eftir þyngd. 

Þær upplýsingar sem hér birtast eru ýmist unnar af höfundi eða fengnar frá áreiðanlegum heimildum. Allt þýtt og aðkomið efni er lesið yfir af læknum og erfðaráðgafa.  Umsjónarmaður á engra fjárhagslegra hagsmuna að gæta.  

Vodafone eru færðar þakkir fyrir að hýsa vefinn án endurgjalds.