Vefurinn gen.is hóf göngu sína veturinn 2002. Þá hafði ég frá því sumarið áður verið að safna að mér upplýsingum um erfðatengda sjúkdóma og setja á heimasíðu mína, www.islandia.is/viggast. Mér fannst ekki fara nógu vel um þessar upplýsingar þar og ákvað að festa kaup á léni. Mér til mikillar undrunar var laust lénið gen.is en á því hafði ég ekki átt von.

En forsagan er auðvitað miklu lengri. það er ekki hefðbundið að blaðamaður með enga menntun í raunvísindum taki sig til og læri vefgerð í þeim tilgangi að kenna erfðafræði eða fræða fólk um sjaldgæfa erfðasjúkdóma, en ég geng yfirleitt ekki troðnar slóðir og sá enga ástæðu til þess hér heldur. Áhugi minn á erfðafræði og sjaldgæfum erfðasjúkdómum er í beinu framhaldi af áhuga mínum á læknisfræði, en sá áhugi hefur lengi verið fyrir hendi, eða allt frá því ég var barn. Það dugði þó ekki til að ég færi í nám í læknisfræði, þó svo mig langaði til þess, lífið tók einfaldlega aðra stefnu. Og þar sem vegir forsjónarinnar eru órannsakanlegir, hefur líf mitt aftur breytt um stefnu og nú er ég á leið í nám sem sameinar allt það sem ég hef áhuga á. Læknisfræði, erfðafræði, blaðamennsku og kennslu. Eg ætla nefnilega til Wales í haust ef allt gengur eins og það á að gera og fara þar í mastersnám í erfðaráðgjöf. Síðustu tvö árin hef ég verið að undirbúa þetta nám með því að fara vítt og breitt um háskólann og sækja námskeið í fögum sem ég hef talið koma mér að gagni. Með náminu hef ég verið svo heppin að fá að vinna við vefgerð í Læknagarði og hef notað tækifærið til að læra meira og meira og kynnast fólki sem ég kem til með að starfa með að námi loknu.

Í líffræðinámi í Ármúlaskóla hitti ég fyrir frjóa og áhugasama konu, Sigurlaugu Kristmannsdóttur. Hún hefur gert nokkra vefi í kennslunni og við ákváðum í vetur að slá saman þekkingu okkar og áhuga á að fræða aðra og gera gen.is að því sem ég ætlaði í upphafi, alhliða kennsluvef í erfðafræði. Vef sem kennarar gætu notað í kennslu, allt frá upphafi og upp að háskólastigi og í framhaldi af því kæmi vefurinn Lífvísir (www.lifvisir.hi.is) sem ég hef unnið í fyrir lífefna- og sameindalíffræðistofu Háskóla Íslands, en hann er kennslu- og upplýsingavefur í lífvísindum.

Það hafa fleiri lagt hönd á plóg. Sigfús Kristmannsson forritari hefur sýnt afburða þolinmæði og á heiðurinn af gagnagrunnsforritun á síðunni. Þegar hann hefur kennt okkur nóg, getum við sett allan vefinn í gagnagrunn en hann á þakkir skildar fyrir alla sína aðstoð.

Katrín Björgvinsdóttir teiknaði myndir í erfðafræði I og hefur með því gert þann hluta vefsins skemmtilegan fyrir litlu krakkana.

Ósk okkar Sigurlaugar er sú að sem flestir geti notað sér þennan vef, hvort sem um er að ræða nemendur, kennara eða almenning og við þiggjum allar ábendingar um efni og það sem betur má fara. Póstfangið er gen@gen.is.

Vigdis Stefánsdóttir